أهلاً و سهلاً! يـــــاه... بقالي فترة ماكتبتش حاجة هنا. أنا لسة مخلص امتحاناتي و واخد الأجازة مابقاليش يومين على بعض، بس مبسوط قوي و إن شاء الله هاستفيد من الأجازة ديه. يا رب. أنا قريت حاجات كتير على ويكيبيديا في الكام يوم اللي فاتوا و اكتشفت حاجات جديدة ظريفة عامةً و حبيت أشارككم حاجات منها:
1) في مرَّة من المرَّات لمَّا البخاري، الراجل اللي كتب "الجامع الصحيح"، كان رايح بغداد، أهل البلد حبوا يعملوا له تحدي كدة علشان يشوفوا موهبته. الراجل كان معروف بذكائه و قوة ذاكرته، فقرر أهل بغداد احتبارها. جابوا عشر رجالة و حفظوا كل واحد منهم عشرة أحاديث، بس كانوا مغيرين المتن و السند بتاع كل حديث. و لمَّا البخاري وصل بغداد و الناس اتلمت، بدأوا يسألوه في الأحاديث. قام أول واحد من العشرة: تعرف حديث كذا؟ و يجاوب البخاري بالنفي. طب الحديث التاني؟ لأ برضه. خلصوا المائة حديث و كل مرَّة البخاري بيقول لأ. بعديها قام، و قال لأول واحد من العشرة أن أول حديث هو قاله كان المتن و السند فيه غلط، و قال ليه الصحيح بتاعه، و بعديها الحديث التاني، و التالت، لحد ما صحح المائة حديث اللي اتعرضوا عليه. الواحد مننا اليومين دول بيتكلم مع شخص واحد مابيبقاش فاكر كان بيقول إيه من خمس دقايق. يقال أن البخاري قال: "أحفظ مائة ألف حديث صحيح، وأحفظ مائتي ألف حديث غير صحيح."
2) موسيقى موسيقى موسيقى! أنا قريب اكتشفت كذا عازف و مؤلف موسيقي عربي فأنا مبسوط. الأول كنت باسمع عزيزة مصطفى زاده (من أذربيجان)، و بعديها اكتشفت ظافر يوسف و أنور براهم و ابراهيم معلوف و نصير شمَّة، إلخ. (أنا كنت عارف عزيزة و نصير من قبل كدة، بس سمعت لهم موسيقى ماكنتش سمعتها قبل كدة.) حمزة علاء الدين هو اللي قلبي متقطع عليه... مش لاقي له غير ألبوم واحد، و غير كدة لازم عى يوتيوب بقى. ليه يعني؟!
3) في اتنين من علماء الدين اسمهم الاخير "الغزالي": أبو حامد الغزالي، و محمد الغزالي. الأول لقب بـ"حجة الاسلام"، و التاني بـ"أديب الدعوة". زمان كنت باتلخبط و ماكنتش عارف أنهم مختلفين و أنهم عاشوا في أزمنة مختلفة.
4) رابعة العدوية كانت متصوفة، و اسمها كان رابعة لأنها كانت رابع بنت لأبوها.
هاسيبكوا دلوقتي مع ظافر يوسف، صاحب الصوت القوي و العميق:
يا رب...
:)
