- ساعات باحِس أن الدنيا مش بتلخبطنا، و أن إحنا اللي بنلخبط نفسنا على الفاضي. الدنيا أبسط مما نتخيل، و لكن إحنا مش بنعرف نتعامل مع البساطة الشديدة ديه علشان إحنا متعودين أن الحاجات لازم تبقى صعبة. ممكن يكون كلامي مش واضح، فهابسطه أكتر: الناس في الدنيا بيعملوا كل حاجة... فيه اللي بيشتغل، و اللي بيلعب، و اللي مش عارف، و كل الأنواع المختلفة من الناس. كل واحد بيواجه صعوباته الخاصة، و لكن، في نهاية اليوم، الشمس بتنزل علشان تتطلع اليوم اللي بعده. الكون بخير، إحنا اللي بنصعب كل حاجة. (ساعات باحِس أن الحيوانات أذكى مننا علشان هم مش أذكى مننا.)
- لمَّا تكون متضايق من حاجة، فكر في أن الحاجة ديه لو مش هاتموتك، بيقى هاتعدي... و لو هتموتك، يبقى مش فارقة خلاص. القرف من أي شئ اختيار شخصي.
- كل واحد فينا فاكر نفسه، على رأي عمرو سلامة، فيلسوف الغبرة. نصيحة: ماتفكرش كتير (غير لو عندك وسواس قهري، و ساعتها ربنا معاك).
- في أيام كدة بيبقى الواحد صاحي نفسه يعمل حاجة حلوة النهاردة ممكن تغير حياة حد أو ماس كتير، بس أول ما بيبدأ يفكر في الموضوع أو يتشغل بحياته بيقرر يسيب الفكرة و كل اللي ممكن تعمله. المرَّة الجاية ماتسيبش الفكرة غير لمَّا تبدأ تنفذها.
- حاجة صغيرة ممكن تعملها: و أنت رايح أو راجع من البيت، ممكن تسيب شوية أكل أنت جايبه جنب أي عمود أو سور في الشارع، فياكله واحد فقير جعان، و تاخد أنت حسنات لأنك أدخلت سرور على قلبه و أكلته. لو دعا لك كمان يبقى يوم حظك!
ليست هناك تعليقات:
إرسال تعليق