1) مفارقة صغيرة بسرعة كدة: المقطع اللي فوق ده مقطع كوميدي قديم. قارنوه بالكوميديا الموجودة اليومين دول و فكَّروا في التحول الرهيب اللي حصل ده و إيه أسبابه و توابعه و هانروح فين من هنا في المستقبل.
2) بعيدًا عن الكوميديا، تعليق عام: لو هاتطلب من حد يشرح لك أو يحكي لك حاجة، أيًا كانت، اسمع كل اللي هايقوله. غير أن ده هايحسسه أنك بتقدره، أنت ممكن جدًا تفهمه غلط لو ماسمعتهوش للآخر. كل شخص ليه طريقة مختلفة في توصيل الفكرة من عنده للناس التانيين، و في ناس ماينفعش معاهم أنك تسمع نص و تسيب نص.
3) أحب أتقدم دلوقتي بشكر خاص لل2% من البني آدمين اللي باحبهم اللي بيخلوني أستحمل الحياة مع ال98% الباقيين اللي مش باطيقهم بدرجات متفاوتة.
4) "اضحك للدنيا تضحك لك" ده مثل ناقص. الأصح يبقى حاجة زي "اضحك للدنيا تلاقيها بتقول "مين العبيط اللي بيضحك ده؟" و تضحك لك (أو عليك)."
ليست هناك تعليقات:
إرسال تعليق